Ji er'etta Jói

Síðasta kvöldmáltíð mín (vonandi þó ekki allra síðasta) var afskaplega gleðileg. Það er reyndar alltaf gleði í huga mér þegar ég borða en í gærkvöldi var gleðin með mesta móti.

Ástæðan?

Jú, matarklúbburinn Ji er'etta Jói hóf göngu sína á ný.

Klúbburinn var stofnaður síðasta vetur af mér, Kristjönu, Ingibjörgu, Helenu og Þórdísi. Vakti hann svo mikla lukka að við gátum ekki annað en startað honum á ný.

Hróður klúbbsins hefur greinilega borist utan landsteinana því Hulda vinkona okkar góð ákvað að koma til Íslands og dvelja hér eitthvað fram á vetur til þess eins (eða ég trúi ekki öðru) að fá að vera sérlegur aukameðlimur klúbbsins. Það er nú ekki verra því það þýðir aðeins eitt, fleiri matarboð víhú.

Kristjana reið á vaðið og galdraði fram dýrindis kjúklinga/tómatsúpu og súkkulaðir/ávaxtaköku í eftirrétt með unaðslegum vanillurjóma. Ég á ekki til nógu mörg eða góð lýsingarorð til að lýsa því hve unaðslegur maturinn var.

Það er því ekki hægt að segja annað en Jói hafi farið vel af stað.

Þórdís á næsta leik og líða ekki nema tvær vikur þangað til hún blæs til veislu eins og henni einni er lagið.

Ég get ekki beðið.

Það er bara spurning hvenær Jói sjálfur sér sér fært að mæta. Hann er jú heiðursmeðlimur klúbbsins. Hann bara veit það ekki :)